همسة غلا

أوهيجنات ومواويل
وريح إقحوان وجو دار مريفه
بعد سقاه من المزون الهماليل
صادق حقوق الوسم مدري خريفه
ونار سناها مرعب ظلمة الليل
والجو هادي والسوالف طريفه
مع دلة رسلان ومبهره هيل
فنجالها للراس طبه وكيفه
وفي لحظة مني وانا اناظر اسهيل
دق الرقم نواف واثره رديفه
صوت غنوج ويفتر الجسم والحيل
والقلب زادت سرعته عن رجيفه
تقول وين الناس ياشاعر الجيل
نسيتنا والا خذتك الوظيفه
والله لقول الحق مافيه تضليل
ان اتصاله والعلاقه نظيفه
خامس سنه يروح ليل ورى ليل
وأنا أنتظر وصل الوليف الولففه
ودار الحديث وزان حلو التعاليل
يوم اغمد الوشاااي رمحه وسيفه
مالي جليس الا القمر والمعاميل
ومعاتبات أهل القلوب الشريفه
وزفت لنا ريضان نجد التباجيل
وغنت لها صم الجبال المنيفه
نشمي بن مقعد نايف العتيبي