صوت الصورة

خيال يدرّب فوق حاجز حصانه
يدرّبه هاوي جرى وسط ميدان
ركّب لجامه ثم جوّد عنانه
يطمر بعزمٍ بين حاجز وعمدان
محمد إبراهيم الفهيد - الزلفي
الخيل والخيال من ماض الازمان
بينهم نشت علاقة وثيقه
قفز الحواجز له خيولٍ وفرسان
وله تداريبٍ عليها عميقه
سعود عائش الحربي - القاهرة
خيالنا اللي من قديم الزماني
فوق الخشب تعلم القفز بالخيل
شوفوا البساطه.. شوفو ذاك المكاني
بيوتٍ قديمه.. والنخل.. قلة الحيل
خالد بن ناصر المخيمر - روضة سدير
الله يدوم الأمن ويصير خيّال
لا غارت خيولٍ يغير بطلبها
خيّال لا شفته من بعيد تهتال
وشفت العقال وغترته لاعصابها
تقول مال القوم فالدار نزّال
كلٍ تبعّد ديرته ما قربها
ولد.. ولد وان قلت رجال.. رجال
صعبين جو وروّض الصعب صعبها
غنام مسعود القريني - نعام
سلامي على اللي ماسك عادته ما حاز
حياة الحضارة ما أثّرت في تقاليده
تعلّم ركوب الخيل والقفز والجمباز
على سنة الله والنبي كنها عيده
مبارك بن محمد بن طرجم - وادي الدواسر
الخيل عزّ وغاية الفارس مناه
وخيال هالصوره على خيله وجال
يدرّب المهره على قفزة مداه
لا فيه لا مضمار والدعوى سجال
حمد عبدالله الوايلي - حوطة سدير
على ركوب الخيل وصانا الرسول
علّم اعيالك كان يبغون الفلاح
أزرع بهم عاداتنا حسب الاصول
محتاجه القمّه تميز .. والكفاح
عبدالله بن عبود السهلي
الخيل اصيل وراكبه خوش خيّال
قفز الحواجز من قديمٍ يجيده
بصحراء وحايطها مع جوانيبها جبال
وحب الاصايل شاربه مع وريده
سعود عبدالعزيز الهزاع - نعام
عزالله اللي صرت فارس وخيّال
روّضت لك مهرة عنيده.. عنيده
وقفزتك هذي قفزت أبطال.. أبطال
بالصورة اللي شفتها في الجريده
بشائر القحطاني - الرياض
نستقبل مشاركاتكم الشعرية على إيميل الخزامى:
rb-khozama@alriyadh.com
أو الفاكس رقم: 4871070
ونرحب بالصور الهادفة والطريفة التي تلتقتطها عدساتكم..
ويا هلا
صورة العدد السابق