مشيتك مع من تود بأرضٍ ندية

ودي امشي في الطبيعة والورود
واتهنى بشوف غدراناً مليّه
الخضار يشوقني روحي تزود
بهبة النسناس في ارضٍ عذيّه
المطر ينزل وله برق ورعود
وشوفتي للسيل هي الجاذبيّه
النفل ريحه مع صافي الخدود
والغيوم اللي لها بالارض فيّه
زين خلق الله في سهل ونجود
وفي جبالاً عالية وارضاً وطيّه
وزين شوف العشب في عرض النفود
مع شعاع الشمس في وقت اضحويّه
يحترك غصن الخزامى بكل عود
والورق يسحرك في روحه وجيّه
يشبه امواج الشواطي في الحدود
لقتفته ارياح تلعبه هديّه
والحقيقه يكتمل عقد العقود
بمشيتك مع من تود بأرضٍ نديّه
يابعد عمري وروحي في الوجود
اعطني كفك نبي نمشي سويّه
في فياضاً خضر ماليها الودود
بالزهر والفل اوراقه طريّه
والخباري ملي قُمريها يشود
بأعذب الالحان لسامع شجيّه
متعة الدنيا عساها لي تعود
وغيرها بالكون ماهي لي شهيّه
غير طاعة واحدٍ طبعه يجود
او مصاحب غالي اخصاله وفيّه
مناحي سعد السبيعي