وقت الفضاء ماهو مثل ساعة الضنك

احذر ترى الدنيا تغرك وتفتنك
لأنها تلعب على كل موال
من لايعرفك يافتى مايثمنك
والهرج ماودك يكرر إذا انقال
وقت الفضاء ماهو مثل ساعة الضنك
ولكل ساعه فيه موقف ورجال
بعض الرجال اليا قضى حاجته منك
يصد عنك ويعتبر طيبك هبال
وبعض الرجال بوزن طيبك يثمنك
ويرد لك طيبك إذا حدك الجال
هذاك إذا جاك الخطا منه ياعنك
ماهي غريبه كل رجل ٍ له افعال
وهذا إذا جاك الخطا منه يغبنك
وتضيع في تحليل وضعه والاحوال
غني عني وأحمد الله غني عنك
وكل ٍ على دربه له آلام وآمال
مهما ضحكت دنياك في يوم تحزنك
لابد من حزن ٍ لو ان الفرح طال
يطعنك شخص ٍ ماتوقعت يطعنك
ويسعفك شخص ٍماطرا لك على بال
شفت الذهب لو صنعوا بالذهب تنك
يبقى ذهب غالي ولا ينقص ريال
والزنك مهما صار يبقى هو الزنك
لو انصنع باحدث طرازات واشكال
يعني معادن صح معدنك معدنك
والمغترب لابد يرجع للأطلال
هي كم بيت إن شاء ربي تفطنك
يمكن لعل الله يصلح بها الحال