صوت وصدى

يافارس صميدان. تسأل عن الحال=ودك تعرف اخبار شوق الغريبة
تعصف بي احزاني من الجال للجال=الحال: مُتعَب..والليالي كئيبه
إن زاد لك بوحي..أو الصمت بي طال=في مجمل الاحوال.. تبقى مصيبه
انا شربت المر فنجال فنجال=ما باقي ٍ من عمري الا سريبه
الهم في قلبي تمركز ولازال=يكوي معاليق الضمير بلهيبه
والحزن يعزف سيمفونيه وموال=طا قناديل الامل من نحيبه
ياليت حزني ياابن الاجواد رجال=والله لانيشن في ضلوعه واصيبه
يلعب علينا الوقت باقفاي واقبال=وكلن من الدنيا يحصّل نصيبه
الصدى - فارس الصميدان
ياشوق لاتشكين من بعض الاحوال=فعل الزمن ميرالزمن من طليبه؟
قبلك رمانا الحزن والحزن قتال=مصيبة تقفي وتاتي مصيبة
اشوف فيك الهم يلعب ويختال=نفسك من الضيقات صارت عطيبة
وش صايبك ياشوق وش بدل الحال=عقب الاماني وش حصل ياالغريبة
كنتي قبل ياشوق مضرب للأمثال=الطيب والتحنان والله عجيبة
انتي بلاك انثى عن الفين رجال=انثى لها بين المخاليق هيبه
والحين حزنك غير وهمومك ثقال=باين عليك الضيق من دون ريبه
صرتي كذا كنك للأحزان تمثال=ويبقى الفرج ربي علينا يجيبه