سنة نومة الرباع !!

نبض المدرج

اكتشفت اني ما كتبت مقال من سنة نومة الربّاع السعودي لاعب رفع الأثقال في أولمبياد بكين، والسالفة ان موضوع النوم جاز لي ومن ذيك النومة وأنا مكبر الوسادة لأني لقيت الأحلام أزين مليون مرة من الواقع!!
صحيت من النوم وأنا مروق على الآخر.. أحلام أشكال وألوان طبعاً معظم الأحلام مشفر وأخاف أقول بعضهن تصيدنا أم العيال ويصير مصيري مصير "من أنتم "..؟!
ياجماعة نمت أربع سنين وكل شي بالعالم تغير "أمريكا" رأسها "خال" والقذافي مات وحسني وزين العابدين وعلي صالح راحوا فيها .. و"الدجاج" ارتفع سعره وقطر تبي تنظم كأس العالم وفليكس غير قانون الجاذبية.. وطاش توقف..!!
كل شي تغير بالعالم إلا حاجتين ماتغيرن ..
رياضتنا والفنانة صباح..!!
ياعالم فجعوني يوم صحيت من النوم ودريت أن منتخبنا صار ملطشة لمنتخبات الأردن وسوريا وتايلند وعمان مع احترامي لهم..
والفجيعة الكبرى إن المسؤولين يهايطون بنفس التصريحات ونفس شوفة النفس واللي يسمعهم يقول هذولا جابو كأس العالم ..
تخيلوا يوم فازو فرسان السعودية طبعا حسب ما وصلني وإلا أنا كنت نايم ..
الفايزين الفرسان والتصوير والتصريحات لغيرهم..!!
ياحسرتي على الجمهور السعودي من كثر الصدمات الرياضية صار يدور السعادة بأي شي لدرجة أن بعضهم يسوي حفلات لخسارة فريق ثاني..!!
غاب الحزم.. طبعاً ما هو فريق الحزم أقصد الضبط والربط وشاع الفساد الفكري والرياضي ودحدرنا لين وصل تصنيفنا 10 برا ..!!
وبصراحة هالحين أنا محتار مدري أرجع أنام وإلا أواصل أكتب وأنبش الخافي.. خاصة أن لياقتي لكم عليها بسبب هالبيات الطويل ..
أبي أدرس الموضوع مع أم العيال ويجيكم العلم بس قبل لا أروح أبي أصحح معلومتي اللي قلت لكم إن كل شي تغير بالعالم إلا حاجتين .. والصحيح أنها ثلاث حاجات.. والثالثة دورو عليها..!!