لك يوم

نسيتني في زحمة أفراح دنياك
حتى سلام الله تكاثر تقوله
بين الجحود وبين ذولا وذولاك
سرْت بطريق البُعد عرضه وطوله
عندي بقى من ذيك الايام ذكراك
رواسب لك بالفواد محموله
وشلون أسلي خاطري عنك وانساك
خط الأمل صوبك صعيب وصوله
بعت الحبيب اللي على العهد وياك
ورميت كل التضحيات بسهوله
ما فيك لا رحمه ولا صنت مبداك
نهج القلوب الوافيه ما انت حوله
لك يوم تهزمك الليالي وابلقاك
ودك تعود وغايتك ما تنوله
تلقى فوادي بعد ذلك تناساك
وفيه المشاعر عن هواك مغسوله
أحمد حمدان