حسن ذات وأدب

تنفس الصبح عطر وجنح ليلك ذهب
استبشري الشمس ماتخلفك ميعادها
جاتك تشيل الهبوب اللي معاها تهب
ريحة رذاذ المطر في روضة عادها
من رايح المزن صايرةٍ عجاب وعجب
تلقى بها الروح سلوتها وميلادها
يا سنبله من سمو وحسن ذات وأدب
يا وارفه في حمى من عزها وسادها
قومي على الشرفه اللي صبحها منسكب
قهوة صباحٍ حلاك ان ذاقها زادها
وفلي جريدة شعورٍ فيك ياما انكتب
يغني عن ابداع خلق الله ونقادها
يامن صمته عقاب .. وصمت غيره عتب
لمن ضحكتي تفزّ الخيل في مادها
وإن زغردت عينك اهدأ شي يصبح صخب
ما كنه إلا احتفال الناس فاعيادها
هيا اشعليني وخلي بعض كيدك حطب
ابشتعل نار لجلك يصعب اخمادها
عينت طاريك ليل البارحه وش نهب
من داخل الصدر .. غير العين ورقادها