أخاف هجرك ماأخاف الخناجر

لو ماارتمي جفن السهر في التعاليل
ماسالت دموع القصايد مشاعر
ولولا الحزن والجرح والهم والليل
ماشفت مني شخص طيب وشاعر
ياما تغنوني طروق ومواويل
بعض القصايد ملح والجرح كافر
مثل الخيول الحرف ياسبّق الخيل
خيالها حبري والافكار تامر
اشب من ضلعي حطب واسرق الهيل
برد القصيد احتاج له ليل عابر
شاعر وعندي ألف معنى وتأويل
متزاحمه في البال والبال شاغر
اسج واترنم واجاذب طرف ليل
حبري شجون وراس مالي دفاتر
مثل الغريب وعلها بالتساهيل
طبع الهواوي شين لو قال صابر
طبع الهواوي مايحب التعاليل
ينبش جروحه نبش بين المحاجر
حبيبتي والحيل ماعاد به حيل
أخاف هجرك مااخاف الخناجر
عندي حنينك يشبه احيانا السيل
ومن قال لك اني على السيل قادر
وقفت له مره .. ووقفت بالحيل
والحين شف في داخلي هالمقابر
حبيبتي عودي علي مات بي جيل
ماباقي الا مغترب بك مسافر
حاولت لك .. حاولت بك اي تبديل
انتي المدينه وامنياتي معابر
طعنة جفاك لساقط الدمع تهويل
طعنتك حلوة.. لكن الدمع ....
اقسى طعونك هالحنين اول الليل
واقلها دمع يبل الحناجر