جفاف القلوب

قسا .. ولا تغلي أو جهل ولا جفاف قلوب
على كثرة مطر غيمي وورود الحب عطشانه
مصيبة كان بزرع وانتظر واجني الثمار كذوب
يخيبني الحقل وأنا بذلت الجهد من شانه
خبرت إن الجليد ليا وقع فيه اللهيب يذوب
وخبرت إن البحر ما ينكره لوله ومرجانه
ليالي تشرب إحساسي سيول وتنبت العذروب
ليها تمسي عيوني وتصبح شوف ولهانه
ارتبني.. ولي هبت هبوب تردني مقلوب
تغطي وجهي رمال الحياة وتقلب ألوانه
نعم مدري البلى بالأرض ولا بالنبات عيوب
أو أظن الحيا غير مكانه واخلف أزمانه
عجيبة كيف صدقي حاصله يصبح علي ذنوب
أقدم ما بوسعي للغلا وأفوز بإحزانه
الملم ما بقى مني وأدور للوضوح دروب
أبفهم ذا المصير اللي وصلني ويش عنوانه
وشفت ان الزمن يشبه رجل يلبس شماغ وثوب
قريب ولا نخيته شح في عطفه وبحسانه
تقابلني الأماني.. تلطم خدود.. وتشق جيوب
تصيح وتشتكي ظلم وألم تقصير وخيانه
أعيش وراحت أيامي ضحية عاطفة واسلوب
ذبل فيني الطموح وخاطري ضاقت بي أركانه
سالم الصقور