الدمعة

ناديتها وين أنت وين أنت وين أنت
إلين ما الدمعة على الخد طاحت
وأقول أقبل وارجعي زي ما كنت
عيني ولا به يوم منك استراحت
قمت اتذكر حبها يوم هيمنت
من يمها كل الأحاسيس صاحت
بكتاب حبه داخل القلب دونت
أسمى معانيها مع الدم ساحت
ذكرت جفنه يوم في جفنه أمعنت
الناعس اللي تل قلبي وشاحت
وليل على متنه تمايلت له لنت
ريح الخزامى والنفل منه فاحت
ماغبت عن عيني وحتى إذا نمت
بأحلام ليلي صورتك فيه لاحت
مجنونها في كل الأحوال برهنت
حبي لها وغيره من الخود زاحت
عبر المدى حبي لها اليوم أعلنت
عد الطيور اللي بالأغصان ناحت
زانت بعيني ليتني بعينها زنت
وهي الوحيدة في خفوقي استباحت
أخلصت في حبه وفي بعدها صنت
وأصبر على مره وأقول استراحت
وناديتها واين أنت وين أنت وين أنت
إلين ما الدمعه على الخد طاحت
ورد الصدى مالك بها اليوم ياأنت
إن كان قصدك هي ياشين راحت