يشره عليك كميت يا قمة طويق

في مفترق درب العناء يزفر الضيق
وصرت أتنهّت من حروفي وأقاسي
وقمت أتنفس من شعوري طواريق
ما غير انا والقاف راسه وراسي
فكري تنكّد ما اقدر الهم ما اطيق
غصب ٍعليّ ان كان ضاقت حواسي
شربت كاس المر مع فكّت الريق
ماغير انا والفكر نلعب اساسي
كل ما احاول انتعش يوم وافيق
أشوف بقعاء عوّدة بإنتكاسي
يشره عليك كميت ياقمة طويق
لوكنت متربع بنجد متواسي
وتشره على الشيمه صدور المطاليق
والضغط يتفّجر بقو احتباسي
ويشره على الكذاب قل التوافيق
ويشره على المنطوق بعض الخساسي
إلى متى بقعاء على الخاطر تويق
إلى متى والحظ مبعد وناسي
نصف الطرب فيروز والنصف توفيق
وبعض الطرب هالوقت جاب النعاسي
وحذراك تسمّع لو تجيك المطافيق
اللي تورّث بالنمايم مآسي
الجوع نقمة وبالأوادم مطافيق
وراع الفقر ماشاف كبر التباسي
وراع الشجاعة حدّه المر والضيق
والليث هايب من وجيه البساسي
عبدالكريم إبراهيم بن خزيّم