قهوتني عيونك

يا اللي حديثك عذب.. وأوصافك إلهام
قهوتني عيونك.. قبل لا اتقهوى
كل ما شربتك.. عادت ضلوعي حيام
ضامي حشا.. ومن النظر فيك .. ما أروى
لا تلومني.. متى تجاوزت الأحلام
وأخذت لأشعاري.. من اشياك حلوى
يا خلطة الإبداع.. في نجد.. والشام
الزين زينك .. والشعر فيك.. يسوى
لا ترخي الغره.. ولا ترفع لثام
لثمتك .. عن ذبح المخاليق.. تقوى
قالوا قمر؟ وأقول.. يمشي بالأقدام
ونصف الشهر.. بين النجوم ايتعلوى
لا يا قمر .. يا نور.. يا جال الإعتام
الليل حالك.. و المزاهير تثوى
مشتاق لك .. وأنا.. على ليلة العام
بيني.. وبين الليل.. والعطر.. نجوى
حتى عيوني.. ما تبي عقبك تنام
يجي لها طيفك.. عن النوم.. سلوى
أرجوك.. ثم أرجوك.. لا تصير ظلام
ظلم ٍ من الغالين .. للقلب بلوى
غلاك .. ما يحسب على كثر الأيام
غلاك.. مع نبض الشرايين.. يقوى