يا صباح السبت غاشيك السواد

بمشاعر الحزن الشعراء يؤبنون سلطان الخير

القلم عين - المشاعر - والمداد
يستثير الصمت في بحور الخليل
والهجوس اللي شكى طول السهاد
انفتح له - ( باب ) - لو حمله ثقيل
يا صباح السبت غاشيك السواد
يا صباح الفقد والخطب الجليل
شوف تأثيرك على عيون العباد
بالدموع اللي من الفرقا تسيل
تبكي اللي ف (الثريّا ) له شداد
يوم غاب الجدي واستاحش سهيل
الحكيم - النادر - الشهم الجواد
الأصيل ابن الأصيل ابن الأصيل
الغلا بيرق و( سلطان ) البلاد
والله إنّه ما يمر ( عابر سبيل )
لا قصرت مدات خلق الله زاد
بالوفا والطيب والمد الجزيل
تنفق - يدينه - ولا هاب النفاد
كنّه يبشر - محبينه - بسيل
للجروح النازفه كان ( الضماد )
وللقلوب البائسه كان المعيل
وكان به شخصٍ من الوضع استفاد
من وفاة : النايف الشم الطويل
استفاد - البخل - من فك القياد
والكرم ما عاد له حيله وحيل
القوافي ترتدي - ثوب - الحداد
والدعا له والعزا ( صبرا جميل )
والصحيح اللي بقوله والوكاد
ليت سلطان يتكرر كل جيل
جزاء البقمي