يدعيك عبدك كل ماصار مهموم

يالله ياخالق فضى وارض ورجوم
يامرسل محمد رسولن أمينا
يلي جعلت الناس معطى ومحروم
وجعلت درب الغانمين اليمينا
ألطف بعبدن كل ماجاك مهموم
يدعيك يالله رحمتك يامعينا
مافيه مخلوقن عن الذنب معصوم
كلن ذنوبه في سجّله تبينا
الآدمي لو مر يومن ورى يوم
ماقال عن بعض الامور انتهينا
مايدري إن الموت له وقت معلوم
واقف كما الديان والعمر دينا
ياكم فجعنا في عزيزن من القوم
وياكم قطع حبلن بمده متينا
وياكم مسحنا عقبه الدمع بكموم
نبكي على مافرطت به يدينا
نجزع من التسويف والظلم واللوم
وتقودنا الغفلات قود السجينا
يالله عسى مقسومنا خير مقسوم
مقسوم رحمه طول عيش السنينا
يدعيك عبدك كل ماصار مهموم
ياخير من يدعونه المسلمينا
سامي الوسيدي