المعصية عينها تغري ومزيونة

المعصية عينها تغري ومزيونة
كم لي وانا غارق ٍ فيها وعاشقها
وانا ادري ان دنيتي بالفعل (.......)
بنت ٍ تخون الصديق اللي مرافقها
ماعاد اخايل بروق الذنب ومزونه
لو خيلت بالجمال ولاح بارقها
اللذة اللي برمل الفسق مدفونة
في غير درب الهدى مانيب ذايقها
دموع عيني من العصيان مسجونة
يارب انا طالبك (ذلة لك )اعتقها
بغض لنفسي طريق ٍ فيه مفتونة
واجعل صغاير خطايها تضايقها
لوامة ٍ لو وقع ذنبي على هونه
في غير حبك طلبتك لا تعلقها
عبدك ضعيف ٍ كسير ٍ وده عيونه
ينصب ماها ندامة لين يغرقها
ناصيك هايب ولا غيرك احد عونه
صفحات عمر ٍ مضى ,باليوم حارقها
ياغافر الذنب عبدك محسن ظنونه
دنياه من خاطره جا لك مطلقها
اغفر لنفس ٍ من التقصير مغبونة
انت الغفور الرحيم الرب خالقها