صوت الصورة

ياللي على القارب وحمّلت الاغنام
رجل الدفاع مهمته ترفع الراس
ارجال كفواً للمهمات.. وأحشام
انقاذهم شامل على كل الاجناس
علي رشيد الرشيد - رياض الخبراء
ياللي تشيل الغنم باللنش
بالك من اللنش لا يقلب
وليا قلب ما يفيد الونش
وقالوا لك الناس لا تجلب
غازي بن قاعد العتيبي-الدوادمي
صورة العدد عدسة الزميل ابراهيم الجبر
ذي فيضة البريكه شمالٍ من الأسياح
قبل شهر يوم المناطق تسيلي
ضر الغنم سيله .. ولا ضر الأرواح
بحفظ الولي ثم محتمين الدخيلي
فهد بن عقيل الطويان – بريدة
راعي وخرفان في قارب
بمحاوله يقطع السيلي
السيل قطعه هو المأرب
من قبل ما يمسي الليلي
سعود عائش الحربي - القاهرة
ربي كريمٍ يرسل الخير لديار
جفت مواردهم على السيل شفقين
ليث المطافي لاحدا الوقت بحار
ينقذ حياة اللي من الخلق لبقين
سعد الحماد- روضة سدير
عن الغرق حط النجد بمركب الصيد
واجتاز سيلٍ غرقت الأرض من ماه
قطع نعاج ومن تحتهن مواليد
بقارب وملاحه عرف وين مرساه
سعود بن عبدالعزيز الهزاع - نعام
بعض المواقع كلها سيول واخطار
لا جار نهار السيل حذراك تنصاه
راعي المواشي قدمكم صار محتار
يبي السلامه يترك اليوم مرعاه
محمد بن عبدالعزيز الخنيفر - أشيقر
لاهان من يسعى على راحت الناس
وقت الرضى.. والا بوقت الشدايد
ورجال الدفاع اللي لهم فعل واحساس
قاموا بواجبهم ولو كان كايد
حمد عبدالله الوايلي - حوطة سدير
السيل نعمه والمخاييل تفرحك
والغرق له منقذ.. وأمن.. سلامه
سبعة أطرافٍ فوق قارب وتحزنك
لولا رجال الأمن راحت عدامه
خالد بن ناصر المخيمر - روضة سدير
من كان له حيلةٍ يحتال
ينقذ حلاله بمقطوره
السيل من هو وطى يشتال
لا تأمن السيل وغدوره
مبارك محمد الضعاوين - وادي الدواسر
بامر الولي صار هالطوفان
واحذرك تسكن بودياني
سلام يا منقذ الخرفان
تستاهل الشكر وعرفاني
عبدالكريم عبدالرحمن السلوم - القرائن
أترك الوديان لا زاد المطر
وانتبه للغنم ياراعي الحلال
أنجي بنفسك لا حل الخطر
وأترك الباقي على قرم الرجال
عبدالله سعد السبيهين - شقراء
ما هي غريبه تنقذون البهايم
حقٍ عليكم هالوجيه السفيره
في شرعة الإسلام ما به هضايم
حقوقنا في محكمات وسيره
عبد الله بن فهد الدوسري – الرياض
القارب اللي شفته شايل له غنم
راعيه مسوي خير قايم بالمهام
والمشي للقارب على الماء من النعم
ياربي تجزا فرقته فعله تمام
محمد بن صالح الطرش - رياض الخبراء
يوم السهل زمجر وناص البريكه
صار الخطر للي بوسطه يبيتون
يا لآدمي عقلك لزوم تحريكه
فكر براسك مانت فاهي ومجنون
عبدالكريم النغيمشي - الربيعية
أشهد إنك بطل يا طيّب النيّه
لا دعاك الوطن .. قلت الوطن غالي
الذهب ما يبين .. إلا بعد كيّه
و انت مثل الذهب .. يا طيّب الفالي
لطيفة محمد العبدالرحمن - الرياض
قل الربيع وزاد كيس الشعيري
وضاقت عليّ أديار نجد الوسيعه
وخليت بالمركب حلالي يسيري
اذنني القاء جزيرة منيعه
سيف خلف الحربي - الخبر
نستقبل مشاركاتكم الشعرية على الفاكس 4871070
أو الإيميل الخاص بصفحة الخزامى:
RB-khozama@alriyadh.com
زاوية (صوت الصورة) ونرحب بالصور الهادفة والطريفة .. ويا هلا