وين المباني ووين فلان وفلاني

حمام ياللي لعى صوته مسياني
يلعي بصوته على غرس الشمالية
حسيبك الله على ترديد الالحاني
هيضت بالصدر عبرات(ن)ومخفية
يالورق مدري تجر الصوت طرباني
والا انت مثلي غدت عينك شقاويه
ان كان يالورق جاك اليوم ماجاني
انا اشهد انك تنوح وفيك مافيه
هو هيضك شوفتك لغروس بستاني
صارت هشيم(ن)ماغير جذوع محنيه
او هيضك شوفة بيوت(ن) وجدراني
صارت خراب(ن)عقب ماهيب مبنيه
وين المباني ووين فلان وفلاني
وين المسايير وين العالم الحيه
راحو اهلها والاول يتبعه ثاني
ذي سنة الله والدبره سماويه