تخرجنا

بسم اللي ما تنام عينه.. خالقنا ورازقنا.. أببدى أحيك قصتنا..
سنين مضت.. وكلنا.. في صرح سعود تعلمنا..
بدينا ندرس وندرس.. وترجمنا وترجمنا..
تعبنا إيه ما أنكر.. بس.. حلوة نتيجتنا..
وفي هذا اليوم يا دنيا.. بنفرح بتخرجنا..
اسمحولي يا أكرم حضور.. أرحب بنور النور..
أطهر من مشى على الارض.. أمي يا بدر البدور..
يضيع الحرف يا ماما.. يوصفك يا أعلى هاما..
يا من تعليتي فوق السحاب.. يا للي طيبك في الدنيا علامة..
وش أحكي وش أقول.. قصير الشكر لو يطول..
يتعب ما وصل قدرك.. تضيق به كل الحلول..
أبفدى تراب رجلينك.. اسمحيلي أقبل يدينك..
يا جعل ربي يا غالية.. يطولي بعمرك وسنينك..
أستاذاتي.. حبيباتي.. ابلتمس منك العذر..
راحت أصواتكم.. ولكن.. ما راح منكم الصبر..
جمايلكم على راسي.. وفخر لي في دنياي..
صعب أوصف احساسي.. لو أمشي من أقصاي لاقصاي..
يكفيني فخر اني تعلمت على يديكم.. يا جعل ربي في دنياكم
يهنيكم..
أبوي.. يا أعلى من سكن باطن الأرض..
ابختم قصيدتي وعيني.. بعيدة عنك ولكن.. كلك ساكن فيني..
خذاك ربي وما قدر.. اعترض على حكمه..
بس يا ربي طلبتك.. تجمعه مع شفيع الامه..
يا جعل دارك الجنة.. وبقبرك تتهنى.
* خريجة جامعة الملك سعود - كلية اللغات والترجمة (قسم الإنجليزي)