دون حدك مكثرين العزاوي والطعون

يا وطنا طال عمرك وجعلك ما تهون
غارس فينا جميلك ويزهاك الجمال
دون حدك مكثرين العزاوي والطعون
ودون حبك كل حب نهايته الزوال
نم قرير العين ف العين فدوتك العيون
واصح وأعلام النصر فوق هامات الجبال
أنت غالي عند أهاليك والغالي يمون
لو تروح الروح من دون غاليها حلال
من نواك بشر يا موطني مات مغبون
ومن تطاول صوب حدك قصر ماعاد طال
عالم أفكارهم عمي مدري وش يبون
ما لهم حيل وحيلة ولا طالوا محال
أنت مذكور بخير وهم ما يذكرون
ما لهم فوق الخريطة مكان ولا مجال
في الزوايا المظلمة والمخابي والركون
وأنت في رأس الصدارة لاشك ولا جدال
طامعين في حدودك لا بالله يهبون
مالهم غير الخسارة ليا اشتد النزال
لا اعتزا كل أبلج ماتغيره الضنون
من رجال في الحرايب يضدون الرجال
غرهم فينا سعة حلمنا مايعرفون
إن للكيف احتمال وللسيف احتمال
إن حربنا نقطع الروس من فوق المتون
وان صلحنا نركب الحبل من فوق المحال
وان غضبنا نفني الحرث وندك الحصون
وان رضينا مارضينا بما دون الكمال
موطني يا موطني وأنت للعليا زبون
ما عليك من العواذل ولو طال المطال
وأنت عمرك قرن خليت لخصامك قرون
نهضة وعلم ومنارات عدل واعتدال
واقع ماهو بحلم مع اللي يحلمون
فرق بين الواقعية ونزوات الخيال
من يكون اللي يضاهي مقامك من يكون
أنت شمس الكون وأنت الذرا وأنت الظلال
والله إنا مانسينا ولاهم يحزنون
كل ماقلنا قصيدة نظم ولا ارتجال
الولاء لك والغلا لك ونعشقك بجنون
ولو تزول أرسى الرواسي ولانا مايزال