طال انتظاري

كم مهرة تسأل من يعيش همي
كم عانس (ن) عانت كلام وبهاذيل
تقول شف حالي يبه (خي) عمي
يا من بقى من عزوتي من رجاجيل
تكفون ربعي يا هل (آه يا امي)
ماحد يحس بحالتي تالي الليل
واكتمك أيا حزني وأمسح بكمي
دمع تحدر من عيوني كما السيل
طال انتظاري واحترق كل دمي
خطر على أصير مثل المهابيل
وأنا اتخيل فارس أحلام يمي
يجي ويا خذني على صهوة الخيل
أبيه ينسيني مع الوقت غمي
أبي يسامرني بليل التعاليل
وإذا طلبته حاجة قال سمي
ياقف معي وقت الرخا والغرابيل
أبي يجيب الورد ويقول شمي
أنتي أميره ما يكفيك تدليل
أبيه همه ما يرى يوم همي
أبي ادموعه عند همي هماليل
وأبي طفل يوله على وقت ضمي
أبي طفل يشعل حياتي قناديل
يجر ثوبي ويتشعمط بكمي
ولا غبت عن عينه يدن المواويل
وصحيت من حلمي على شق فمي
فمي تشقق والسبب غربة الليل