خوة نشامى

يشوقني شوف السحاب المزابير
اللي هموم الوقت خلفي طعنها
نوه يلوح بمقدمه بارق الخير
ويحن رعاده لدار زبنها
عساه بأمر مصور الكون تصوير
يأخذ ثمان شهور ما كف عنها
وديانها تضحك ورود نواوير
وأطيب عطور الكون ينفاح منها
ما عاد لي جلسه من الشوق أبا أطير
لديرة ما كل واحد سكنها
برحلة للنفس وراحة وتحرير
تسوى حياة اللي حياته سجنها
خوة نشامى صادفت خوة الطير
وروح مع المقناص ربي قرنها
ومع شبة الضو والدلال المباهير
وسوالف بالصدق غالي ثمنها
سجه عن اللجة وناسه وتغيير
عن الظروف اللي ذبحنا زمنها
هذي مناتي لو صدوف المقادير
اتبعد أجساد البشر عن وطنها
عبدالله مهل المطيري - ملهم