اتأمل شمسنا حزة عصير

عد الليال المقبلة والمصادير
وفي حالها الدنيا تدور الدواير
أبا اقتطفلك من جميل التعابير
مادام لك قيمة بوسط الضماير
ما فيه غيرك من جميع الغنادير
ولا غيرك اللي له تباح السراير
راع الهوى الطاهر يذوق التعازير
لا صار من خله يشوف العزاير
لو كل طاير يقدر يحوم ويطير
أرسلت لك مرسال مع كل طاير
أرجوك لحظة وأشغل الوقت تفكير
واحسب حساب اللي به الوقت حاير
أسير الأقدام قدام وتسير
خطوة بخطوة ولزماني امساير
يوم أتأمل شمسنا حزة عصير
أزعج قناديل الفتيل النواير
يشيرني عقلي وأنا ما أقدر أشير
في قصتك ممنوع عن كل شاير
أبا أعتبرها من صدوف المقادير
إن كان في غيرك تدور الفكاير
سبحانه اللي دبر الكون تدبير
اللي مدبر كل ما كان صاير
أرجيه ثم أرجي زبون المخاسير
اللي لضيفه ما يحسب الخساير
تكفا وتكفا غالية للمناعير
لو صحتلي جيتك من الدم فاير
فيصل محمد الدلبحي