ياقلبي ألفين

ياقلب خل الخوف يقعد لبعدين
راعيك قدم الموت نوخ اركابه
امنولن ياقلب معيه على الدين
واليوم اشوفك كل دربن تهابه
الصاحب اللي صد واقفى عن العين
عيبن علي ان كان دقيت بابه
وش ينبغي في حب ناسن امقفين
اللي من اغيابه ولا علم جابه
واليا نشدتك قلت قلبي سلاطين
كم واحدن قبلي شكى من عذابه
هاذاك وقتن راح يوم الزمن شين
من غاب ما يدري عنه في اغيابه
حنا بعام فوق يا قلبي الفين
مطيح الابره فالبحر يندرابه
وبك انت وين انته وهو وين هووين
ايحاسبه ربي اليا جاء احسابه
خله تبا تلقا بداله ملايين
والرزق عند اللي ينشي سحابه
كنه سكن يا قلب في وسط بكين
وانته سكنت اعمان واقصى اترابه
انا اشهد انه زين والزين امن الزين
مار البلاء في كبر حضرة جنابه