فلاش

قبل سنة شرالي ابوي (لاب تب) وصرت ادردش مع أصدقائي على الماسنجر ليلياً. بصراحة كل سواليفنا.. متى قمت من النوم.. وش تعشيت.. وين تبي تعشاً.. وش تبي تدخل.. علوم طبيعية ولا شرعية..
وعلى هالحال إلين تعرفت على واحد دخل علينا صدفة بالماسنجر وصارت بيني وبينه علاقة وتواعدنا في محل كوفي كذا مرة وهو أكبر مني.. المهم أهداني حبوباً واكلتها معه.. الحين صرت آكل من ثنتين إلى ثلاث حبات يومياً، ولا أقدر أسهر إلا لازم آكل منهن وصارت أعصابي تثور من أي شيء... والمصيبة إني في مرة من المرات عشان الحق على خويي عند الباب دفيت أمي وصقع راسها باب مدخل البيت.
هذا الولد جابه أبوه بالقوة يبي يعالجه لأنه صار يسرق من بيت أهله ويضرب أمه وخوانه وخواته.. يا الله سترك.
أقول للآباء والأمهات أنهم لازم ينتبهون لعيالهم ماهو بس أشتريلهم جوالات وكمبيوترات وأخليهم يسولفون مع ربعهم على كيفهم.. لازم ياناس إتابعون عيالكم وبناتكم وتراقبونهم وتشيكون على رسايل جوالاتهم بين فترة أخرى بطريقة غير مباشرة ونفس الشيء تشوفون كلامهم وسواليفهم اللي في الماسنجر والمنتديات وعلموهم أن الخير موجود والشر موجود... ويا الله سترك.
الأبرق