أعذار الفرقا

لا تدور اعذار للفرقا وتهجرني
ان كان قلبك سمح لا تحسب حسابي
مانيب جازع وربي لو تغيرني
بقول خاين وابفتح للهجر بابي
ليه اتندم على شي يدمرني؟
وليه اتعثر وانا في يديني زهابي؟
لاحل بارضك بلاء لا لا تدورني
من دون تدري ابرحل واخذ ركابي
خابر ظروفك وقصدك لا تخبرني
ادري بعذرك وتدري وانت ادرابي
شقق دفاتر غلاي ولا تشاورني
واحرق بنار الغدر (ياالصاحب) كتابي
انا ادري اني لفراغك بس ذاخرني
لا تحسب اني حسبتك حسبة احبابي
حاسب حساب الخيانة لا تقدرني
البس ثياب التنكر واخلع ثيابي
من غير تبحث عن اعذار تصبرني
الله واكبر عجزت تخون باسبابي
يعني ضميرك دفعك وجيت تخبرني؟!
لامن ذبحت الغلا لا ترحم اعجابي
لا تشيل هم الفراق ولا تعبرني
روح ودربك خضر لا تحسب حسابي