في العاصمه جانا القطار وركبناه والكل عبر بالفرح من شعوره

الحمد لله صار في الديرة قطار
يشيل كل الناس من حيٍّ لحيّ
يفك أزمةْ قد تواجه في المسار
صار عادةْ في الرواح وفي المجي
وهو بفضل الله تهيّا من ثمار
فكرٍ وتخطيط وعمل ما هو شويّ
محمد مقحم المقحم - الرياض
قطار الرياض اليوم ساير مساره
مشروع مترو عظيم وفاله الفالي
في عهد سلمان خير وبانت أخباره
عام التطور حديث ومبدع افعالي
يا بو فهد سر بنا.. أعمال جباره
تاريخ يشهد على الأمجاد ف العالي
نشوف نجم الوطن باين على داره
يبني صروحٍ بدت من مركز المالي
محمد طويل العمر والفكر مشواره
يا دار عهدك جميل وعهدنا غالي
ومنهو يعاديك يبشر عندنا بشاره
نسقيه كاس المراره شاف الاهوالي
حمد عبدالله الوايلي - حوطة سدير
في العاصمه جانا القطار وركبناه
والكل عبر بالفرح من شعوره
هذا فضل ربي وحنا حمدناه
واللي يبي المشوار خلص أموره
نعرف مساره يوم حنا سلكناه
ونعرف طريقه والخطوط وعبوره
سليمان بن عبدالعزيز السنيدي - الرياض
شِف القطار الجديد وشف مِسارِه
في عاصمتنا تواكب كِل تطوير
تطور كِل حين انشوف اخباره
تعليم وصناعه وصحه وتعمير
الكل أبدى سروره وافتخاره
باللي يعم الوطن مِن وافر الخير
والدوله وجهدها الملفت للانظار
يلقى مِن الكِل عِرفانٍ وتقدير
سعود عائش الحربي - جدة
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق