صوره من الماضي لها عدّة اسنين عرفتها من ددسنن كله خطوط

ياللي على الددسن تشوفون الأخبار
على التلفاز اللي أيامه قديمه
صورة من الماضي ولاشك تذكار
فيه الشقا .. فيه القلوب السليمة
هذا الولد مهتم وش صار ما صار
والاريل المرفوع إشاره عتيمه
والبث أصبح يا ولد عبر الأقمار
لحظه بلحظه والوسايل عظيمه
خالد ناصر المخيمر - روضة سدير
صوره من الماضي لها عدّة اسنين
عرفتها من ددسنن كله خطوط
ورادو حجر من الروس مصنع بلونين
انبيره على الاخبار مبرمج ومحطوط
عقب العصر باطراف ديره متكين
والكل منهم رايق الجو مبسوط
مابه كلافه لا قدور .. ومواعين
مهيّل وبراد على الكيف مضبوط
سعود عبدالعزيز الهزاع - نعام
وجد حالي يا زمان اول تغير
حوله الصحراء ديار مهمهيه
وقفوا يا ناس في وضع يحير
وشوف الأنتل والتلفاز حيه
يا ثنين طالعوا معهم صغير
مرخي راسه ما سوى خطيه
آه يا وقت مضى فيه يتخير
كل واحد ماشي في حر نيه
حمد عبدالله الوايلي - حوطة سدير
ذاك الزمن يا زين وقته .. وجوه
فيه البساطة والربع دايم أصحاب
الناس للناس ولا تغيب المروءه
وكلٍ يبادر من بعيدين .. وأقراب
سطام المسردي - الرياض
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة / خالد العميم)