مشْهد الفلاح يكْرب نخلته بخبره وعزمٍ في حلاله واهتمام

الكر يرقى به رجالٍ بخيصين
فوق النخل يرقون وقت الصرامي
في عصرهم تلقى عددهم كثيرين
والكل منهم يجتهد باهتمامي
متكاتفينٍ بينهم عمر وسنين
وتشوف منهم همّةٍ والتزامي
سليمان بن عبدالعزيز السنيدي - الرياض
مشْهد الفلاح يكْرب نخلته
بخبره وعزمٍ في حلاله واهتمام
حلو البلح ياما دوامٍ أعطته
وعليه يِوليها العِنايه بالدوام
والدوله الفلاح دايم مَدٍّته
فيما يعينه فعل ماهو بالكلام
سعود عائش الحربي - جدة
تسلم يمين اللي على النخل يتعب
يشيل الكرب خايف عليهن من السوس
لا جيت بستانه جميلٍ مرتب
تلقى التمر عنده منظف ومكبوس
والدبس في وسط القوارير معلب
هذا العمل يا ناس ما هوب معفوس
خالد بن ناصر المخيمر - روضة سدير
يا شايب الرحمن بلهون بلهون
حذر ايزل بك القدر وانت عالي
طلعت مطلاع يالله لك العون
في حد طلع النخل توه الفالي
وصلت فوق وباح كل مكنون
افهم تجود واكرب لين حبالي
والكر خله يثبت وراجعه عون
تراك مخطور على كل جالي
يا زين طلع النخيل لااستو الون
الا نجح يجيك بطعمه الحالي
حمد عبدالله الوايلي - حوطة سدير
راقيٍ بالكرّ هذي هي حياتي
معتلي في الجوّ واقطع في العسيبي
صابرٍ والصبر وحدة من صفاتي
واسأل الله كود جهدي ما يخيبي
ما دريت انّه يبي يحدث وياتي
اختراعاتٍ لها شأنٍ عجيبي
التسلّق له مُعَدّةْ به ثباتي
توصل الرجّال لحدود الرطيبي
التّمِر ساس الغذا في النايباتي
هو غذا الجِدّان في الوقت العصيبي
محمد مقحم المقحم - الرياض
صورة العدد (عدسة - ماجد المعيلي)
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com