شوفوا الجدّه تبي تأخذ علامه تجتهد وتخط باليمنى كتابه

في مقعد الدراسه والقلم باليمين
رغم العمر مِع غيرها بمحو الاميّه
العلم هو والسعي له حثَّنا الدين
وميسرٍ للكل صبح ومِسيَّه
والعلم مطلوبٍ ولو كان بالصين
وهو بالوطن ميسرٍ دُون شَيَّه
والدوله اولت التعليم للجنسين
وجهودها للكل واضحةْ جِليَّه
سعود عائش الحربي - جدة
شوفوا الجدّه تبي تأخذ علامه
تجتهد وتخط باليمنى كتابه
مثلها واجد عساهم للسلامه
بالفصل على المكتب رحابه
يطلبون العلم ما فيها ظلامه
وما يهم العمر لو روح شبابه
في ديار الدين نرفع كل هامه
نفتخر فيها وهي مجد وسحابه
حمد عبدالله الوايلي - حوطة سدير
من المهد للحد والعلم مطلوب
واجب على كُل البشر يدرسونه
راع الشهاده فالمناصيب منصوب
وراع الجهاله صكوا الباب دونه
والعلم يفتح لك جميع الدروب
حافظ عليه وجوف صدرك تصونه
محمد عبدالله الشهري - مكة المكرمة
أمّي بتالي العمر تقرا وتكتب
تبي تعلم لو اشوي من الدراسه
يا حلوها واهي جالسه اترتب
دفاترها مع القلم والكراسه
على التعلم النار بصدرها تشتب
تبي تحجز لها مركز بالرياسه
ودها تعرف وش اللي بالكون مرتب
وتصير وحده من فاهمين السياسه
خالد بن ناصر المخيمر - روضة سدير
الخالة اللي ما تقرّ بنهاية
تحل واجبها ما بين الزميلات
يمكن تكون افهم ومعها دراية
والعرف من رب البشر والسماوات
يمكن تكون اسباب علم وهداية
وتدرّس الاحفاد هم والحفيدات
لمحو الأمّية هدف ولْه غاية
والحمد لله عندنا به نجاحات
محمد مقحم المقحم - الرياض
نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد