انا الظلام

حد الشفق لاغادر النور واقفى
تنتابني ضيقه تزلزل كياني
كني سفينه والمتاهات مرفى
تلعبها الامواج والليل داني
وده على شط المسرات تدفى
بس السعاده ماتجي بالاماني
ماترحم الامواج لوقلت تكفى
هذا زمان الجرح هذا مكاني
كل الاماكن للمجاريح منفى
اغراب في هذا الزمان الاناني
يطول ليلي والمجرات تغفى
وانا السهر خيم علي واحتواني
مثل السجين وباب الامال مجفى
وصوت التعب اصبح يصم الاذاني
اطلقت قيد الحلم والصبر معفى
ما ابيه لو نادى الامل واحتراني
مالي رفيقٍ لو تضايقت يرفى
خطاي لاشان الزمان ورماني
وحيد ادور عند الاوهام ملفى
واليوم ياوقت التعاسة كفاني
خلو هبوب الريح للجرح تسفى
ماني بسامع صوت من هو دعاني
وش عاد لوغادرني النور واقفى
انا الظلام اللي صباحي نساني