أسبوع نطوي عام ويدخل لنا عام عامٍ جديد وجعل مقدامه الخير

كان بيت الأسبوع الماضي للشاعر مشعل بن صنت العصيمي من الخرج، والذي يقول فيه:
أسبوع نطوي عام ويدخل لنا عام
عامٍ جديد وجعل مقدامه الخير
وهذا صدى البيت من الشعراء:
يالله عسى فاله به الخير قدام
ونرفع تهانينا فخر لقائد السير
أبو فهد سلمان للضد لطام
ليا ثارت الهيجاء ودقوا لها الزير
وولي عهده راجح الرأي ضرغام
محمد أبو سلمان له كل تقدير
صالح البشري
زمن شهور سنين واعوام واعوام
وِليا رحل عامٍ عسى قادِمِه خير
العام ودَّعْنا مثل سابق العام
ويالله عسى عامٍ جديدٍ تباشير
هذي هي الأيام تمشي لِقِدام
ولا لك على اِيقافَها أي تدبير
والعام هذا احرص على وصل الارحام
الوالدين أوْ جِد لله بالسَّير
سعود عائش الحربي - جدة
تمضي بنا ليام عامٍ ورى عام
والله من فوق الخلايق خبير
في موطنٍ بين البلادي لنا هام
حماه ابو تركي بسيفٍ شطير
واليوم ابو فهد المليك الهمام
يحكم بدستور الكتاب المنير
ولي عهده بالمنصات واعلام
يخدم بلاده باحترامٍ و تقدير
محمد عبدالله الشهري - جبل اثرب
الله يمتعنا على خير وانعام
والقادم أحلى وعند الإله تدبير
والعمر ما يرجع والايام سجام
ويا حظ رجل يدفع الشر بالخير
عبدالعزيز الصقيري - حايل
عام جديد وفيه يركضن الايام
وكل على ما قيل يجري على السير
وتطوي سنين بن آدم طية الخام
والكل يكتب عنه يالربع تقرير
احد قضاها في ملذات وآثام
واحد قضاها في عباده وتنوير
رجا بن عادي بن رمال - الرياض
الله ما أسرع يا ولد جري الأيام
والله على الأسرار واللي وسط بير
وقت نشوفه بين هجه ودرهام
واحيان كنه ما يجي فيه تدوير
بس البخيت اللي للامجاد سوام
ومطيع ربه صدق ومواصل السير
علي مونس بن جدي - الرياض
تجري بنا الاقدار عام ورى عام
والكل منا لاهي يالمناعير
ناس تحب تقضي الوقت بانغام
ما بين لعب ولهو ويقلد الغير
وناس الا جاء الليل من هم ما نام
والله يعدلها وتمضي على خير
نواف هايف الجبرين - الرياض
بيت الأسبوع
كتبه للصفحة الشاعر علي مونس من الرياض، ويقول:
نبدأ بداية خير والعزم جبار
يا رب يالمعبود حقق رجانا
نستقبل صدى هذا البيت بأربع أبيات
خلال ثلاثة أيام من نشر البيت على إيميل الصفحة:
rb-khozama@alriyadh.com