الحمد لله انقضت عطلة الصيف.. وعدنا بخير وحل عام جديدي

كتب بيت الأسبوع للصفحة الشاعر عبطان السويدي من حائل، والذي يقول:
الحمد لله انقضت عطلة الصيف
وعدنا بخير وحل عام جديدي
وكان الصدى من الشعراء أكثر من رائع:
في كل خير انقضت عطلة الصيف
واستقبل الأحباب عام جديدي
ومن فضل ربي كان عام لنا نظيف
وأيضاً في مجمل أموره سعيدي
ولت كورونا جعلها للمذاليف
والخير في كل المناحي يزيدي
ومستبشرين الخير باطلالة الضيف
بآمال نرجيها قريب وبعيدي
سعود عايش الحربي - جدة
الدرس جا والتم شمل المواليف
وحنا يخير وكننا يوم عيدي
واللي رجع من سفرته والتكاليف
ولفى لداره سالم مستفيدي
يحمد إله صرف الكون تصريف
اللي شكر يزوده الله اكيدي
خالد المرشود - الرياض
لا والله إلا عطلة الصيف بالكيف
عامٍ جديد وداخلٍ بعد عِيدي
والجو صافي ما دخل به عواصيف
والعلم وأهل العلم بيومٍ سعِيدي
عادوا بفصل العلم ولا به تكاليف
عسى ولي الأمر عمره مديدي
مشعل بن صنت العصيمي/الخرج
ياحي بيت كلف الذهن تكليف
ورديت من جاش بصدري يزيدي
والحمد للي بين الحق والزيف
رب كريم فاعل ما يريدي
عدنا لاهلنا والمشاعر على الكيف
وعيالنا فيهم نشاط الحديدي
ومواصلين لرحلة العلم يا خليف
يالله عسى اللي يجتهد يستفيدي
والوقت في حده كما شذرة السيف
واللي يتكاسل فالندم له عضيدي
حاتم عبدالله الغريري - الشنان
في حفظ رب ٍعالم بالتصاريف
الواحد اللي كلنا له عبيدي
والحمد لك يامزيّن الكون بالطيف
غاب المرض والشر ولاّ أكيدي
الخير من ربي مع الناس قد شيف
والحمد لك يارب خيرك يزيدي
في دار من هو يكرم الشعب والضيف
سلمان للشعب السعودي عضيدي
عبدالكريم ابن خزيّم - البكيرية
رحله سعيدة يوم صارت على الكيف
ومن فضل ربي في بلادي يزيدي
عوده حميدة مقبل بارق الريف
وعساه عام الخير عام سعيدي
عام جديد ومبعد ساعة الهيف
ونبي نشاط وهمة من حديدي
حمد عبدالله الوايلي - حوطة سدير
بيت الأسبوع
كتبه للصفحة الشاعر نواف هايف الجبرين من الرياض ويقول:
قو العلاقه مع الباري
وتزين لك كل حاجاتك
نستقبل صدى هذا البيت خلال أربعة أيام من نشره على إيميل الصفحة:
rb-khozama@alriyadh.com