الجو زان وزان وقت المكاشيت ويالله تغيث الدار وتعم الامطار

كان بيت الأسبوع الماضي من طرح الشاعر سالم صالح الرمال من حائل ويقول حول دخول الوسم واعتدال الجو ويقول:
الجو زان وزان وقت المكاشيت
ويالله تغيث الدار وتعم الامطار
وكان صدى البيت من الشعراء:
يا مرحبا بك يا الخريفي ليا جيت
يصلح بك المكشات في ذيك الامطار
في ديرتن مامونه و صيتها صيت
مامومتن من كل باغي و غدار
و ان شفت برن خالين فيه حليت
يومين و الثالث نكوفن على الدار
محمد عبدالله الشهري - جبل أثرب
القيض زل وزان جو له اشفيت
ياعاشق الكشتات في روض الاقفار
الله يغيث المملكه عَطرة الصيت
وتعمها الامطار من غيث مدرار
هيْ قبلة الاسلام حاضنة ٍ البيت
في حماية الله ثم طويلين الاشبار
مشعل بن صنت العصيمي/الخرج
سِج القدم في مزهرَات السباريت
اللي سِقاها المزن بالغيث تِكرار
واختر لمطلاعك جميل المواقيت
ولوازم المكشات مِع صحبة اخيار
عِن الصدر تنزاح بعض التناهيت
مِن ضيق معلومٍ وبعضه بالاسرار
ويالله بغيثٍ يرسله والي البيت
يعم الوطن تناقله كِل الاخبار
سعود عائش الحربي - جدة
ونشوف سيل عم ارض منابيت
سيل الخيال اللي يشوق الأنظار
يسجل التاريخ عامه مع الصيت
يسقي ديار ممحله هي والأشجار
تنبت عشوب مزهرات لهاجيت
والبر لا منه تنور بالازهار
ودوج مع رجال تعينك مناعيت
وربع تساهم يوم حزات الأسفار
حمد عبدالله الوايلي - حوطة سدير
عليك باللي ذكرهم يرفع الصيت
اللي تبين أفعالهم عند الأسفار
فزعة وطيب وكل شي تمنيت
ياالله بغيث مبلغه كل الاقطار
تلقى الربيع بكل صوب تمشيت
تزهى الرياض وتكتسي زين الازهار
على الرشيد - رياض الخبراء
واقول ياجو به الخير حييت
الله يجيب السيل ويعم الاقطار
وارض بها الخيرات فيها تهنيت
ويحلا لها المشوار مع ربع اخيار
ولامن بدا المرباع يمه تعنيت
ويزين لي المجلاس مع نظم الاشعار
محمد بن عبد العزيز الخنيفر - أشيقر
جو يسر القلب على ما تمنيت
الله يجيب الخير بنزول الامطار
وارض بها المرباع فيها تهنيت
الله يعم بلادنا وكل الاقطار
جانا الوسم اهلا هلابه وحييت
والجو زان مع ربوعي والاخيار
ريان بن محمد الخنيفر
بيت الأسبوع
كتب بيت الأسبوع للصفحة الشاعر سعود عائش الحربي من جدة ويقول:
إنْ ما شبابك ذَب بك رِيع وحزوم
وش تنتِظر لا قصَّر الجهد والشوف
نستقبل صدى هذا البيت خلال أربعة أيام
من نشر البيت على إيميل الصفحة:
rb-khozama@alriyadh.com