تدري من اللي يسمى في حياته حظيظ

مدرك رضى والديه وسيرته وافية
لاحل طاريه ما يذكر بعلم بغيض
يذكر من اللي عن اعراض البشر غافية
سيرة حياته على الطيب ونواياه بيض
وجنب حقوق العباد وسمعته صافية
مشاعره بالوفاء والجود دايم تفيض
ماهو من حساب ناس ٍ نارها طافية
هذا الموفق وفي دنياك تلقى النقيض
تشوف من حالته في طبعها جافية
يحتار فكرك من احواله وفعله يغيض
باهدافه البينة واهداف الخافية
والمعتبر من تجاريب الزمن يستعيض
يمكن توافق حياته نعمة ٍ ضافية
وعند النهاية خذ الزبدة بخط ٍ عريض
يكفيك مضمونها في نبذة ٍ كافية
من عاش في عافية يشوف حال المريض
مافيه نعمة تساوي نعمة العافية