وين الرفيق اللي يجي مقبل وفرح؟

اللي معالم ضحكته مسفهلّه
اللي ليا منّك لمحته ولو لمح
يرسم سحاب الود فيك ويهلّه
يدمح مواجع زلتك كله دمح
ولا من حكى لك سالفة ما تملّه
يشبه سحاب مرتكم كنها الصرح
فوقك بعيد وياصلك منه بلّه
اللي فهم عذرك يوفر لك الشرح
وتروح شرهة خاطره في محلّه
واللي بنبضه يشتكي لوعة الجرح
أدنى كلامٍ في المسامع يعلّه
الله من كلمة تجي كنها الرمح
يطعن بصدرك لين يدميك غلّه
وكم كلمةٍ لا جتك من خاطرٍ سمح
تبري جروحك من وجع كل علّه
احدٍ يعيش ورفقته كلها ربح
واحدٍ له اصحابٍ تجيه وتعلّه
كنت احسب ان الجمع ما يعشق الطرح
والطرح يلطم خد للي حصل له
طلع لي الناتج ولا صار به شح
ناتج متاهات الهوى جبت حلّه
السنبلة يطلع بمحصولها قمح
حتى ولو غصن العطا مال ظلّه
وهاك الحبيبة يومها تنقض الصلح
قصّت نبات الود واقفت تفلّه
إن حبها قلبي غدت ملها ملح
وان عافها مافادها الزين كلّه