يا طير يالفتّان بالشّكْلِ واللون رمَتْ بِكِ الأقدار في شبْك صيّاد

يا زين لون الطير لو كان موجود
صحيح زاهي كلكم تعرفونه
لقطة مصوّر ما لها حد وحدود
فيها المعاني واضحاتٍ فنونه
ياللي تصيد الطير بالعمد مقصود
الشبك صاده وينكم ما تجونه؟
حمد عبدالله الوايلي - حوطة سدير
ما قدّر الرّحمن بيْصير ويْكون
اللي كتَبْه الله لنا معْهِ ميعاد
يا طير يالفتّان بالشّكْلِ واللون
رمَتْ بِكِ الأقدار في شبْك صيّاد
يا طير ما أحلاك صدّاح بِلْحُون
في روضةٍ خضرا على غصن ميّاد
من هو لدى الصيّاد لهْ قدْر ويْمون
يكْتَبْ على يْدِينه لذا الطير ميلاد
ناصر جمعان آل عوض - وادي الدواسر
عصفورنا الوروار يأكل من النحل
والنحل يلدغ في جنوب العصافير
يالله جنبنا سنيننٍ بها محل
واجعل نباتك للنحالي وفير
النحل في لفلاك يا كم رحل
في كل غصنٍ من نباتك يطير
محمد عبدالله الشهري - أبها
الموت حق وكل نفسٍ تبي تموت
والعمر لو طوّل يجيه انقطاعه
طيرٍ بوسط الجو جاه القضاء فوت
صادوه بوسط الشبك في ربع ساعه
من بعدها جاه النحل يحسبه قوت
يالله دخيلك من شرور المجاعه
خالد ناصر المخيمر - روضة سدير
النحل حصّل صيدته وافترسها
وصار الضّحيه قبضته طير قارور
ضحيته مسكينةٍ هو فرسها
وقتٍ لمحها أصبح اليوم مسرور
لامن بغى الصيده بفكرٍ درسها
واللي بدربه صار بالحيل مخطور
محمد عبدالعزيز الخنيفر - أشيقر
صوره بها العصفور في مشهد أخير
بين النحل والشَّبكْ جات النهايه
الطير في مشهد ورمعاته كثير
لَكِن بها يكمن حديث الحكايه
المحزن إن وراه في عشّه صغير
ضعيف حيل وفاقدٍ الحمايه
سعود عائش الحربي - جدة
من جا بدرب النحل مسكين مسكين‬
تراه لامن جاع ينهي خصومه
هذا النحل معروف له موقفٍ زين
ولامن نوى له صيدةٍ ما نلومه
ريان محمد الخنيفر
النحل ساطي وجد له صيدةٍ سهله
والطير ما قاوم اللي يصيدونه
بالمصيدة واقعٍ يا ناس من جهله
والنحل دايم يهاجم .. ما يريدونه
سطام المسردي - الرياض
نرحب بمشاركاتكم الشّعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com.
صورة العدد (عدسة/ ماجد المعيلي)