صوت الصورة

ماقد خبرنا الذيب قد طار هاللون
وأصبح يدور صيدته من قطاها
ياهل القنص خفوا من الصيد تكفون
حتى الذيابه قد قنصتوا عشاها
عبدالعزيز فهد الريس - الرياض
يا طير حلق فوق سرحان يبغاك
وجبه خفيفه لين يظفر له بصيد
حذراك من الكاسر ترى الناب فتاك
لجل الفريسه يقطع بعيد ويزيد
صاطي ذكي غدار والعز مبداك
لك هيبةٍ ببلاد والا جراهيد
سعود عبدالعزيز الهزاع - نعام
الطير مومي واشهب العين فراس
ومكشر النيبان حاش الفريسه
عزالله انه من لوا الريش محتاس
وعجزن سبوقه ينهضنه وريشه
عوا عليه الذيب والذيب عسّاس
الخوف جاه ويبس الموت ريقه
هيفاء بنت طلال التميمي - سدير
الجوع قاتل ياهل العرف والشور
والذيب ما حصل خروفٍ يصيده
هجم على طيرٍ صغيرٍ ومعثور
يبي يسد الجوع يشفي وريده
يا الله دخيلك والقصى يلحق الزور
عزي لمن صارت حياته زهيده
معذور يا ذيب الخلا وألف معذور
شاعر ومن فعلك تزين القصيده
خالد ناصر المخيمر - روضة سدير
يا ذيب وشبك تطرد الطير ياذيب
فريستك خبري بها شاة ضاني
وياما مخرت بغدرك الفطر الشيب
طير الفلا ما يلحقه كل عاني
ينهض بجنحانه ويتعبك تتعيب
سرحان كب الطير خاطرك شاني
عبدالمحسن محمد المحيسن - رياض الخبراء
يا طير ويلك من فم الذيب ويلاه
بغى يخمك لكن الحظ اخطاك
فريت فرت خايف ربي انجاه
يومك ثنيت الذيل لاحد ماطاك
بينك وبينه فتر لا ما تعداه
نوى يصيدك ثم يمسي تعشاك
يا ذيب صيدك ماهو الطير وشلاه
خابرك ذيب والفرايس بماطاك
حمد عبدالله الوايلي - حوطة سدير
الذيب يحلق طير والطير محتار
والجوع هو سبته في لحاقه
والله هو الرزاق علام الأسرار
والذيب لامن جاع فيه الحماقه
يا طاير بالجو ملحوق لا طار
والحمد لله ربنا اليوم ساقه
محمد عبدالعزيز الخنيفر - أشيقر
سبحان من قسم أرزاق المخاليق
لو كان في جو السماء الرب جابه
الطير جاب الكسب جته المطافيق
كلٍ يجي رزقه ولو هو نهابه
رزقك يجي لو صك دونه مغاليق
لو هو بعيد الدار حظك لفابه
لطيفة بنت محمد بن مطرب
صيده على المطلوب والرب جابه
وأنا ذبحني الجوع والرب رزاق
ولا بغيت الصيد ما من غرابه
والله لأجيبه بطني اليوم مشتاق
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق