النمر هاجم والضحيّة هو الطير.. الله بيدينه تصاريف الأقدار

يا نمر ياللي على الصيد ضاري
لك ختلةٍ ما تخطي الصيد مرّه
وتبي تصيد الطير عز النهاري
مديت مخلابك واوميت حرّه
اشوف طير الجو جارح وفاري
وخطرٍ يخبط النمر فيها مضرّه
اللي حداه الجوع وقت المساري
في خايع جوّه يجيب المسرّه
حمد عبدالله الوايلي - حوطة سدير
النمر هاجم والضحيّة هو الطير
الله بيدينه تصاريف الأقدار
رزقٍ مقدر للبهايم بتقدير
رزق الخلايق قدره حتى الأعمار
تسبيحها دايم ولا فيه تقصير
والناس ما تفقه تفاصيل الأذكار
علي رشيد الرشيد - رياض الخبراء
الطير يدّور صيدته والنمر جاه
وقتٍ لمح له طير قرر يصيده
مسكين وسط البر والجوع خلاه
يبحث عن الصيده وصيده فريده
صاد الفريسه حصّل اللي تمناه
وصارت حياته من بعدها سعيده
وراحت حياة الطير بعد المعاناه
في منظرٍ شفناه يلزم قصيده
محمد عبدالعزيز الخنيفر - أشيقر
شوف الفهد قوّة وسرعة مرونه
والطير نجّاه البخت والمقادير
كم قوةٍ تجلب خسار .. ورعونه
ويا كم ضعيفٍ فاز بحسن التفاكير
والطير ماله غير ربه معونه
ثم الجناح إن بالوطا شاف تعكير
والرزق والآجال ما هي مصونه
بالقوّ أو بالضعف أو رغبة الغير
سعود عايش الحربي - جدة
بعض الوحوش الضاريه عيشها درق
من الجوع ما تعطي نفس للفريسه
تهجم عليها بسرعةٍ تشبه البرق
مخالبٍ للصيد دايم نحيسه
بين الاسد والنمر ما بينهم فرق
الكل منهم يودع الصيد حيسه
خالد ناصر المخيمر - روضة سدير
انا أشهد ان النمر بالحيل مقهور
من طير طاير لكن الحظ جابه
هذي رسالة وافهم العلم والشور
النمر له طلعات ولامن غرابه
لامن بداه الجوع قرر على الفور
ومن قابله مسكين يحسب حسابه
ريان محمد - الخنيفر
‫خبطها بكفٍ مخلبه كنه شنكار
ولا فادها بعد المسافه عن الرقه
تحول من الجوع المزوّي إلى طيارد
وحدد أبعاد الفريسه بدقه
نمرٍ يخاوي الموت دايم والأخطار
ونفسه على ميقاعها للعشاء شفقه
عبدالرحمن الجبر - شقراء
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.