الواقع نعيشه كذا هرج واسكات

على مساحات الرضى والسكينه
راضين بالمقسوم في كل الاوقات
وعبدالمعين الله بعونه يعينه
عسى الكريم اللي يدينه خليات
يصبح عليه الصبح مليا يدينه
وعسى البخيل اللي يدينا مليات
يصبح عليه الصبح ما شال دينه
الأول من الفقر ذاق الصعيبات
وصابر على وقته بشينه وزينه
والثاني الحرمان حط له شارات
والبخل سوا شارةً في جبينه
معطيه ربي لكن البخل نكبات
منه متعوذ من دفن في المدينه
نبينا اللي نذكره في الصلوات
وحنا بما قال النبي تابعينه
والا الكرم طبع النفوس العزيزات
صفات من جعله اتطول سنينه
والفقر لو أن له على الناس هدات
ما كف قلب الطيّب ولا يمينه
كم من فقير ما لقى قوت يقتات
ويكرم ويعطي بالسخاء قاصدينه
وكم من غني مغتني بالفلاشات
عطاه للمداح.. ومصورينه
ماعَم.. لكن زبدة الشعر وقفات
والحاصل إن الوقت هذا غبينه
تغيرت مع البشر والعلاقات
حتى الردي ينظر لنا بنص عينه
ياالله بوجهك والليال الاخيرات
ما هي بزينه.. صعب لا أقول شينه
والصبر زين وله حدود ومساحات
والعقل طبع للعقول الرزينه
لكن على الله ياعسى كل مافات
للصيت والذكر الوفي ذاخرينه..