ما جيت أدور للقناعات تبرير

ماجيت أدور للقناعات تبرير
إلا علشان الوفاء والمودّه
ادمح وصافح وادمغ الشر بالخير
ومن مدلك يمناه حذرى تردّه
إذا الخطأ من صاحبك خلك بعير
حبل الوصل من بينكم لا تشدّه
ودايم لوجه الله تساعد مع الغير
ولا تحسب اللي صار انسه وعدّه
وأوف الحقوق ولا تقدم معاذير
في حق ربعك واقرب الناس بدّه
وبالوالدينك قبل تلفى المقادير
احسن لهم بالبر والدِين ردّه
واعطف على اللي ما بلغ توه صغير
وارحم كبيرٍ طال عمره وهده
وشاور إذا تاهت دروبٍ معاسير
اللي يشاور يوصل العلم حدّه
واليا بغيت الرزق مع طلعة الطير
قو العزوم وكب نوم المخدّه
وثلاث للرجال تعطيه تقدير
الدين والأخلاق وسلوم جدّه