الفياض مربعه والجو كايف ما يكمل وصفها غير النظافه

كتب بيت الأسبوع للصفحة الشاعر حمد عبدالله الوايلي من حوطة سدير حول موضوع المحافظة على نظافة الفياض والاهتمام بها، والذي يقول:
الفياض مربعه والجو كايف
مايكمل وصفها غير النظافه
وقد كان الصدى من الشعراء:
ماحلا جمع الأحبة والولايف
والمحبة والغلا رمز الضيافه
في فياض فوقها النوار طايف
والخزامى ريحها يعطر ضفافه
من يعيش بجوها ماله حسايف
ماترده دونها بعد المسافه
وان مشيتوا منها بليا كلايف
قل لهم مكاننا يبغى نظافه
زبن مقبل العنزي - بريدة
شدّني بيتٍ(ن) تحلّى بالوصايف
لابن وايل كلنا شفنا ما شافه
زانت الغدران بأمواج(ن) لطايف
والحطب مشبوب،من هو الي يعافه
لكن الي يكدر ويجعلك خايف
من يخالف دايم أصول النظافه
من تقيَّد بالنظام إنسان نايف
يامواطن النظافه هي ثقافة
صالح علي المبارك - حوطة سدير
خل عنك النوم لاتجيك الحسايف
الاراضي مربعه ولامن كلافه
واضرب المشوار مع ربع ولايف
الكسل معروف كم فيه الحسافه
وانتهى ياصاحبي عصر المصايف
وان وان خلصت لموقعك سووا نظافه
محمد بن عبدالعزيز الخنيفر - أشيقر
الربيع اليوم ما يبغى وصايف
شف بنفسك لاتفكر بالمسافه
خذ عيالك لاتفكر بالكلايف
بساط اخضر والله انك ما تعافه
وان نزلتوا فيضة قل مايخالف
لاخلصنا ودنا حصة نظافه
ريان بن محمد الخنيفر - أشيقر
بيت الأسبوع
كتبه للصفحة الشاعر محمد عبدالعزيز الخنيفر من أشيقر، وذلك بمناسبة الذكرى الرابعة للبيعة لخادم الحرمين الشريفين الملك سلمان بن عبدالعزيز آل سعود - حفظه الله - ويقول البيت:
سنين اربع مضت فيها دحرنا كل خواني
بها ذكرى لسلمان الوفاء والقايد المحبوب
نستقبل صدى هذا البيت بثلاثة أبيات تدور حول هذه المناسبة السعيدة، وخلال أربعة أيام من نشر البيت.
على الإيميل:
rb-khozama@alriyadh.com