شوف الغدير بجنب راس النفودي منظر رهيب مصوره شخص بارع

الجو ساحر والبشر جوها رايق
والناس تبحث عنْ ظُروفٍ تُوَنِّسْها
جو خيالي يسعد الزَّعْلِ والضايق
يذهب عن النفس الحزينه تُعُومِسْها
اطْعوس رملٍ شكلها بالمطر فايق
ترفه بعد غيبه تلاقت بِمِعْرِسْها
كلٍّ يشاهد منظر السيل ويوايق
منظره يجذب والمشاعر يلامِسْها
واللي يطعس علّ ما يصدفه عايق
ولا يحرمه ربي هوايه يمارسها
ناصر جمعان آل عوض - وادي الدواسر
شوف الغدير بجنب راس النفودي
منظر رهيب مصوره شخص بارع
اللي جلس مع صحبته.. قال مودي
واللي براس الطعس.. موده يقارع
لاجا المطر نفرح غياب وشهودي
وتفرح طيور وضان وأهل الشوارع
يا رب من رحماك تملا السدودي
وتنبت فياض ونفد والجال فايع
عبدالكريم النغيمشي - لوذة
كلش طبيعي من نفود وغدران
سيل تكون من سحايب غمامه
بر لك الله منظره يبهج أعيان
للي شكى من جور وقت ودوامه
الطقس عادي مناسب لك يالإنسان
اطلع تفرج في نفود الثمامه
وياللي تبي التطعيس الوضع لك زان
بس الحذر مطلوب أمن وسلامه
سعود عبدالعزيز الهزاع - نعام
طاح المطر والأرض شربت من السيل
والناس فرحت والفيافي تملت
وطعوسنا اللي تشتكي قلّة الحيل
سالت بعد ما هي من القل ملت
زانت لنا الكشتات جر المواويل
وشبابنا تطعيس رمل وتسلت
كل يجهز موتره قير تدبيل
وهموم قلبه من عنا الوقت ولت
خالد ناصر المخيمر - روضة سدير
لا جاء المطر والخير موترك بطران
وطلعت براس النفود بشطاره
إذا نزلت خلك حريص وفهمان
ترى الغدير مليان ماء بغزاره
عبدالله علي الحوشاني - بريدة
مشاهدٍ في البر جوٍّ مطير
إن رمت صفو البال فجِّ بديع
زين الكثيب وزين ميّ الغدير
غنّت له الزوّار تال الربيع
جرّة مواترهم على خدّه تشير
أنتم وحنا جابنا مشهد متيع
والطعس له موتر وسايق شطير
مع مالزم كشتك وأصحابك جميع
وعن الضرر لا تقرب الجزء الخطير
الله يزيّن لك ذهابك.. والرجيع
سعود عائش الحربي - جدة
يا هاوي التطعيس أحذر وأعلمك
تعدم حلالك ثم تنهي حياتك
وين المرور يجيك ماشي واكبلك
وتكون في سجن حصين مباتك
يأخذ عليك من الغرامات يدبلك
يا هي مصيبه كان هاذي صفاتك
نشره على اللي ضيعك لين اهبلك
لكن أنا أوصيك هذي وصاتك
حمد عبدالله الوايلي - حوطة سدير
يا زين شوف البر شوف الصحاري
وشوف الفياض اللي تساقط بها أمطار
أطرب لها يا ناس وأشب ناري
ويا حلو عقب المطر ريح الأزهار
سطام الهذال
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد
Your browser does not support the video tag.