تركي فقيده

قصيدة في رحيل الأستاذ تركي بن عبدالله السديري رحمه الله
اليوم بصفحات الجرايد عناوين
واهمها عنوان تركي فقيده
حزن جثم فوق صدور المحبين
وكل على فرقاه حاله نكيده
تركي السديري مهجة القلب والعين
راعي المراجل والعلوم السديده
رجل القلم والفكر ماله معادين
رمز يشع النور وسط الجريده
جريدة تجمع رموز السلاطين
ومن بينهم تركي صفاته فريده
كل تعاه وصابه الحزن والبين
ومن العجم والعرب وناس بديده
قلم يشع كالنور وسط الميادين
بفكره وعلمه والمواقف حميده
ونفسه سمت بالطيب ماله معادين
سمت إلى مجد تحقق وعيده
أنعاك يا تركي وجمع المحبين
وأخص أنا نفسي بحبك واعيده
اسمك ورسمك باقي كالنياشين
بصدر الصحافه بالرياض الوحيده
علك بجنه وافره بالبساتين
خضراء هبايبها نسايم نديده
وعزاي للأسره وكل القريبين
واللي يحب تركي واللي يريده
وما مات من ورث صقور مربين
تحمل صفات بالمحاسن رصيده
وصلاة ربي عد من جاء الحرمين
يطوف حول البيت نفسه سعيده
على محمد عد شوف المصلين
واعداد حجاج تزايد عديده
أحمد بن حجي الشايع