صَفْقِ اليدينِ وزفرةٍ تِلْوِ زَفْرات يجنيهن المهمل بوقت الحصادي

بيت وصدى

ارسل للصفحة الاخ سعد الغريري طلباً بإدراج بيت الشاعر عبدالله بن سبيل الذي يقول:
لا تاخذ الدنيا خراص وهقوات
يقطعك من نقل الصميل البرادي
وكان صدى البيت من الشعراء:
صَفْقِ اليدينِ وزفرةٍ تِلْوِ زَفْرات
يجنيهن المهمل بوقت الحصادي
اللوم ما ينفع على ماضيٍ فات
ولا بد مايندم كثير الرقادي
طبع التِّوَاكِل آفةٍ ضمن الآفات
ماضيع العالم سوى قول مادي
ناصر جمعان آل عوض - وادي الدواسر
الوقت يمضي مالنا فيه حيلات
مايمنعه ياكود رب العبادي
واليا نويت الدرب واخذت سجات
احس الامور وخل علمك وكادي
وكم واحد تظنبه طيب هقوات
واليا بغيته ولم العذر عادي
خليف فهيد الحربي - الرياض
دنيا تجي وتروح وان راحت وجات
أيامها تضحك وتبكي العبادي
لاضحكت ضحكتها مثل سكر انبات
وإن كشرت مثل الرهاف الحدادي
والنور يكمن تحت سود العبيات
والمرجلة عند الظروف الشدادي
سالم علي السومحي - السيباني
يامساير الدنيا على كل مشهات
اخذ الحذر منها بكل اجتهادي
الها على العاقل مواري وبصمات
يسّعَد بها اللي طاع رب العبادي
يدرنها تمشي على كل موجات
واحبالها قصيرة ٍ بالوكادي
مشعل بن صنت العصيمي - الخرج
الطيب عد والمراجل كرامات
وإلا الردا بين ولا له مبادئ
وبالناس كنز وللاودام مقامات
والناس شفهم بين مقدي وغادي
والعمر يمضي والليالي سريعات
ازرع وتلقى ما جنيته وكادي
صالح محمد البشري - الرياض
عبدالله سبيل ترى حيْ مامات
مثل الهرم شعره كشف كل وادي
كم ْواحدٍ ن وداه فكْره متاهات
متخالط ٍعنده بياض و سوادي
غشِّة براد الوقت بدروب مضمات
خلى ّالصّميل وراح من غير زادي
فهد بن عقيل الطويان - بريدة
امعن نظرك الدرب مليان لفات
طالع طريقك بالعيون الحدادي
وترى زمانك فيه حلوه ومرات
وبينك وبين النفس حرب وجهادي
احرص على من صحت له في الملمات
يصرخ يقول ابشر رقبتي سدادي
حمد محمد الحنو - عودة سدير
دنياك لو دامت لكم بالمسرات
لابد من يوم تجيك بنكادي
لو تبتسم لك في سنين قليلات
تقلب تراها ماعليها اعتمادي
خانت بهل جاه ومنصب وأمارات
فيها الامن مفقود هذا وكادي
سعود عبدالعزيز الهزاع - نعام
دنياك غرارة يجي به مفاجاة
ما يبني العاقل عليها اعتمادي
كم واحد مدد حبال طويلات
يمشي ع الأوهام ويصير غادي
من يأمن الدنيا تصيبه بغرات
يصير جوه مختلط بالسوادي
علي الرشيد - رياض الخبراء
بيت السبيل ماضي له سنوات
لاكن ذكره مثل شربي وزادي
فيه المعاني كامله من رهاوات
ارضه ثبات وباني في شدادي
ومن لايحدد فكرته والاداوات
يجيه من نوش السيوف الحدادي
حمد عبدالله الوايلي - حوطة سدير
سبحانه المعبود رب السموات
مرسى الجبال الشاهقات الشدادي
ومصرف الأكوان في كل الأوقات
اضرب طريق الحق تغنم وكادي
واذهن حياتك دايم بالمهمات
واحسب دروبك بالمعوشه وزادي
عبدالمحسن بن محمد المحيسن - رياض الخبراء
بيت الأسبوع
ارسل للصفحة الأخ منصور شليويح العنزي بيت محمد بن مهلهل الذي يقول:
لو عندنا من غيب الأيام رسه
الادمي مصلوح نفسه يدله
نستقبل صدى هذا البيت "بثلاثة أبيات" فقط خلال ثلاثة
أيام من يوم النشر ويكون الإرسال عبر الإيميل:
rb-khozama@alriyadh.com