العيون السود

أنا أفضحتني عيوني وأنتي السبّه
كلِ عرف وجدها يوم أنتثر ماها
لو أن من تعب من حمل الهوى ذبّه
سويتها وأكثر العشاق سوّاها
لكن فيها أنفتنت وشوفها أحبّه
محدٍ تعوّد على حاجه وخلاّها
مدري ورى قلبها ماخاف من ربّه
تِبكي عيوني وهي بالحب تسواها
ماهوب حقي عليها القلب تلعبّه
وانا بعد عرفها ماطيق فرقاها
جميع حلٍ يجيني منها أرحبّه
الاّ أني أنسى محبتها وطرياها
باموت وأقبر وتركز فوقي الصّبه
لابحت منها ولا راودني أنساها
أشوفها بالكرى وأفز متنبّه
أقرا لها الشعر والورد بيمناها
فديت ذيك العيون السود واللبّه
والخصله اللي تفرّق عن محياها
يابنت قلب هجرتي عجلي طبّه
بالله شوفي عيوني منك وش جاها
في كل ليله ضيوف وعندكم شبّه
وانا ضيوفي دموع العين وأبكاها
خالد البقمي