غلطة قصيّر الباع

لا جاتك الغلطة من قصيّر الباع
هوّن على نفسك وروض غضبها
دامه على ردك شفوقٍ وطماع
صمتك يخلي النار تأكل حطبها
خل الخبل لا تجادله شين الاطباع
ترى الخبل لا من خرَبها خرَبها
ماهيب ذله مير ترقى عن القاع
من شان ما تبدي العوارف عتبها
واللي مع الشيطان تابع و منصاع
تحقّره ناسٍ تعلّت بأدبها
ودام الاوادم هذي اشكال و انواع
حاول تفرق في تفاوت رتبها
سوق السوالف فيه شاري وبياع
ولا كل غلطة جات لك بتحسبها
لا جات من جاهل ويجهل بالأسناع
روّح وخل أم الجرب مع جربها
وآن كان عاقل فردف الصاع بالصاع
واضرب مضاريبه آليين تعطبها
ما لله خلقنا للمخاليق خضّاع
ونقلب الغلطة ونسهر سببها