يا راية العز والأمجاد سباقه يوم الوطن عندنا له زود منزالي

صوت الصورة

يوم الوطن يوم مجيد ومعروف
صقر الجزيره وحّد الدار بالدين
لملم شتاتٍ عقب فرقات وظروف
ذكرى الوطن في عام ست وثمانين
والمملكه شمله توحّد ومألوف
والرايه الخضراء ترفرف بسيفين
الأمن وارف ظله امبدد الخوف
والعدل نوره فوق كل الميادين
عبدالمحسن محمد المحيسن - رياض الخبراء
هذا اختيار موفقٍ يا المسيهيج
ذكرتنا ماض الوطن ذا له سنين
يوم الوطن للشعب عز وتتويج
صقر الجزيرة وحّده للملايين
وحدة وطنا للمهات تفريج
ألف وثلاث ميه وواحد وخمسين
ميعاد ثابت ما يجي فيه تعويج
الله يديم الأمن ويثبت الدين
علي الرشيد - رياض الخبراء
يا هلا بك يا فخر منهو سعودي
أبو تركي رمزنا صقر الجزيره
بشوفته يطري لنا يوم السنودي
يوم توحيد بلادنا ذكرى قديره
اليمنى بها سيفٍ على منهو حقودي
واليسرى بها عنان خيلٍ شهيره
الله يرحم فارسٍ عزم وجهودي
وحّد أركان دولتنا الكبيره
خالد ناصر المخيمر -
روضة سدير
صقر الجزيرة بالفخر دوم معروف
عساه بالجنة مع الصالحيني
وحّد كيان الدار بالخيل وسيوف
سته وثمانين العلم رافعيني
والخير عم الدار والعالم تشوف
في كل موقع من شمال ويميني
وضد العِدا حنا جماعات وألوف
والحمد لله يوم حن غانميني
محمد عبدالعزيز الخنيفر - أشيقر
يالله ياللي سمعت الصوت من عالي
يا خالق الخلق وكافل كل ارزاقه
ترحم إمام العرب في قبره الغالي
اللي رفع راية التوحيد خفاقه
ثم وحد المملكه مع ربعها الخالي
يا راية العز والأمجاد سباقه
يوم الوطن عندنا له زود منزالي
ونفديه بأرواحنا للموت مشتاقه
حمد عبدالله الوايلي - حوطة سدير
اخير ما تنقل بيارق هل الدين
لفض الجلاله بدولة العز مكتوب
ويوم الوطن قدره على الراس والعين
فيه المؤسس وحد الدار بدروب
على مهار ركضها في الميادين
قدح الشرر من خلف حافر وعرقوب
على الاصايل بالشجاعه مسمين
من هازهم عده على النفس مطلوب
سعود عبدالعزيز الهزاع - نعام
ذكرى أخو نورة بنى المجد بأفعال
بنى بلاد العز.. والعلم.. والدين
وشفنا بلادي بالفخر فعل الأبطال
عز ومعزة تسعد القلب.. والعين
ستة وثمانين مضت عز ورجال
بنوا بلاد المجد وللمجد ساعين
سواعدٍ تبني من الجال.. للجال
هذي فعول أبطالنا دوم وافين
ريان محمد الخنيفر
شوفوا معزي على صهوة جواده
والسيف دايم في وجيه المعادي
منهو يريد الخير حققنا مراده
واللي نوى بالشر قص الأيادي
والعدو دايم ننسيه زاده
بالطايره قصفٍ وفي كل وادي
لطيفة بنت محمد بن مطرب - القرينة
يوم الوطن يومٍ عزيزٍ وغالي
ذكرى عزيزة فيه مجد وبطولات
للفارس اللي راسيٍ كالجبالي
أسعد بلاده في جميع المجالات
بشائر القحطاني - الرياض
تنويه:
نظراً لاحتجاب الصفحة يوم الجمعة ولارتباط الزاوية بمناسبة اليوم الوطني نزلت الزاوية هذا اليوم بصفة استثنائية على أن تعود إلى كل يوم جمعة كالمعتاد.. ونرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد