لا تطري الفرقى ترى القلب مكلوم

فندي الغوينم
افتح شبابيك الهوى جيتك اليوم
بإحساس من زود الوله كني أطير
جيتك كما طفلٍ له أيام محروم
عن حضن أمه أبعدته المقادير
والا كما عودٍ له سنين مهموم
وده يلاقي بآخر الوقت تقدير
كلي صدر عاشق وهايم ومغروم
وده يضمك لين تصبح على خير
ليتك تعرف إن الهوى شي مقسوم
من قسمة الخالق على عبده يصير
في دربك أنا لو تعثرت أبا أقوم
وأنهض من أجلك يا عذاب الغنادير
لي في هواك أحلام وآمال وعلوم
وأحباب وأصحاب وقصيد وجماهير
وهموم وأفكار وهواجيس وحلوم
ودروب وأخطار وعذاب ومشاوير
وحب وغلا وإخلاص ومعاند ولوم
وإحساس وإلهام وشعور وتفاكير
وصحبة سهر ومقاطعة لذة النوم
وأشواق مكبوتة وعشق وتعابير
في ذمتك مابان لك شي مكتوم
من بعد ماصورت الأوضاع تصوير؟
من ماضي الأيام الى يومك اليوم
وغلاك عندي ماحصل فيه تغيير
لا تطري الفرقى ترى القلب مكلوم
ولا يفيد النفس كثر المعاذير
لا يفرح العذال باللوم والشوم
ثم يحصل في خاطري بعض تكدير
وأنا الذي ما أقبل البيع والسوم
يا راس مالي ما قبلت المخاسير
وأنا الوحيد إللي على بحرك يعوم
واللي عرف مرساه رغم الأعاصير
في كل شي أتخيلك وأسمعك دوم
وأتأملك في الوقت الأول والأخير
لاتحسب إنك شي عابر ومعدوم
وتاريخ حبك فاق كل الأساطير
أنت الطرب في أغنية أم كلثوم
وأجمل حكاية من حكايا شكسبير