أصحاب الألباب البديعة

المود اللي نشدني ليش ضايق
فيه شي مزعلك ماهي طبيعه
قلت لو انك على صدري موايق
شفت شي للخلايق ما نذيعه
كم دفنا من ورى سور الغلايق
سرنا من دونه حصون منيعه
غير فاح الصدر من هرج العلايق
تهمز وتلمز عساها للقطيعه
العباد اللي تزيد من الحرايق
نفعها يبيطي ونكبتها سريعه
فكروا في جل لاشياء والدقايق
واذهنوا يا اصحاب الالباب البديعة
المنافق لا يحصل له طرايق
يتخذ له من بعض لاشياء ذريعه
كل منهو عن طريق الحق مايق
واجب انا ناقف وننكر صنيعه
ما يضيع الحق وتغط الحقايق
في سلوم البدو واحكام الشريعه
وابن ادم عمره ايام ودقايق
ما يموت الين ستافي جميعه
ثم يسوقه يم قبر الدود سايق
ما عمل محفوظ له حفظ الوديعه
اما في جنات وانهار وحدايق
ولا في نار مواجعها شنيعه
علي بن سالم ابوظهير